Dembaş Xwendevanên Hêja,

ev malpera Amadekariya Ansiklopediya Kurdistan e, wê di derbarê Kurd û Kurdistan de hertişt tê de hebe; dîrok, cografya, çand û huner, wêje... Niha em di destpêka vê xebatê de ne, em hêvî dikin bi demê re bi alîkariya we xal bi xal bê dagirtin û tekûz bibe.

Çi kesê ku xwedî xebat û lêkolînan be, dikare di xala pisporiya xwe de ji me re agahiyên xwe binivîse; piştî kontrolkirina ji aliyê komîteyên pêwendîdar ve, heke hat erêkirin em ê li ser navê xebatkarê ku dokuman şandiye xalê di malperê de bicih bikin. Bi mebesta dewlemendkirina xalan bi demê re dibe ku hin lêzêdekirin an guhertin di xalan de bêne kirin.

Wek ku tê zanîn, Kurdistan di nav sînorên çar dewletan de hatiye payêkirin û hîn negihaye azadiya xwe. Loma piraya berhemên di derbarê dîroka Kurdan de ji aliyê serdestan ve ya hatine windakirin, ya hatine bincilkirin û dîrokek çewt ya Kurdan ku li gora berjewendiyê xwe afirandine danîne ber raya giştî û di dibistanên xwe de jî didin xwendin. Di heman demê de çand û dîroka Kurdan dizîne û gelek nirxê wan ji xwe re kirine mal. Heya niha derfet û îmkan rê nedaye xebata ansiklopediyeke berfireh, lê niha bi îmkanên ku teknîk raxistine ber me, em dikarin bi hevkarî vê xebatê bimeşînin. Em li ku derê dinyayê bin bela bibin, em karin xwe bigihînin hev û zanînên xwe bi hev re payê bikin. Dema di malperê de hûn têkevin beşa Têkilî de, hûn dikarin nivîs, sûret û vîdeoyên bi xalên pisporiya xwe ve girêdayî ji me re bişînin. Çi nivîsên ku bê şandin wê bê xwendin û nirxandin, piştî kontrolkirinê heke bi zanistî hatibe amadekirin û ji çavkaniyên di warê ilm de xwedî cihekî qebûlbûyî be, wê di xalê pêwendîdar de werin bicihkirin.

Karên ansiklopediyan karekî giran e û bi salan dom diki; em jî divê ji cihekî dest pê bikin û her bi her xebat bê berfirehkirin. Di dinyayê de xebatên ansiklopediyan berî bi sedsalan dest pê kirine û ji ber rewşa welatê me em pir dereng mane. Ev jî bi pirayî me mehkûmî xwendina agahî û berhemên ku dujminê Kurdan yan jî yên bi pirayî Kurdan nas nakin nivîsîne dikin. Loma hewcedariya me bi lêkolînên zanistî û Kurdewarî heye da ku em rastiya dîrok, çand û erdnîgariya xwe derxînin holê. Ji ber ku Kurd û Kurdistan xwedî dîrokek qedîm û dewlemend in, Kurdistan cihê pêşketina insanetiyê ye; ev xebat ne tenê ji bo Kurdan, wê bibe xizmetek bi tevayî.

Amadekariya Ansiklopediya Kurdistan bi organîzekirina PENa Kurd wê bê meşandin, wê tê de gelek rêxistinên pêwendîdar cih bigrin û her kesê ku xwedî pisporiyê be dikare beşdar bibe. Ji bo birêvebirî û biryardayîna nivîsên xalan ev komîte hene:

Desteya Şêwirmendan

Komîteya Edîtoriyê û Birêvebiriya Giştî

Komîteya Dîrokê

Komîteya Erdnîgariyê

Komîteya Çand û Hunerê

Komîteya Malperê

Rêxistinên Beşdar 

Kesên ku bixwazin di van komîteyan de cih bistînin, dikarin bi beşa Têkilîyê ya di malperê de bi me re têkevin têkiliyê de.

Nivîsên ku niha di malperê de hene xebatên destpêkê ne, her ku xebatên berfirehtir û çêtir were em ê wan biguherin. Heke di xalan de hûn xelitiyan bibînin yan tiştekî ku hûn li xalan zêde bikin hebin jî hûn karin bişînin. Dema hat fêmkirin ku xebat tekkûz bûye, ji nû ve bi navê ANSIKLOPEDIYA KURDISTAN wê wek kitêb cild bi cild bêne çapkirin. Em ê li bende pêşniyar, nivîs û danhevê we bin. Bi hêviya serkeftinê.

Komîteya Edîtoriyê û Birêvebiriya Giştî

ya Amadekariya Ansiklopediya Kurdistan