Mervan Serhildan

Mervan Serhildan di sala 1958an de, li bajarê Mêrdînê, li navçeya Şemrexê ji dayik bûye. Diya wî Bedrêya Sêlîmê Emer e (ji gundê Şewaşî), bavê wî jî Felîtê Mhemed Husênê Simoyê Fato ye. Navê wî yê fermî, Besalet Yaray e.

Dibîstana seretayî li Şemrexê, lîse jî li bajarê Edeneyê xwendiye. Di serdema lîseyê de bi mijarên civakî, siyasî û neteweyî re hevrû bûye. Di nava salên 1970yî de ji aliyekî ve berxwedana başûrê Kurdistanê bi hestiyarî şopandîye, ji aliyê din ve jî li ser mijarên siyasî û neteweyî ku her tim rû bi rû maye, hiziriye. Bûyer û geşedanên ku di jiyanê de bûye şahid, ew bi ber xeta azadî, demokrasî û serxwebûna miletê Kurd ve beralî kiriye...

Di sala 1980yî de, li Enqereyê Zanîngeha Gaziyê beşa ‘Ragihandin û Rojnamegerî’yê qedandîye. Di navbera salên 1976 û 1980yî de li komeleyan û li taxan beşdarî xebatên civakî, siyasî û bîrdozî bûye; her wiha di derheqê mijarên bîrdozî, civakî, siyasî û rêxistinî de li komeleyên Kurd ên li Enqereyê semînerên perwerdeyê dane. Encax piştî darbeyê, ew jî hatiye dîlgirtin; ji aliyê pergala 12ê Îlonê ve bi xedarî hatiye îşkencekirin û bi cezayê darvekirinê hatiye darizandin. Bi biryara Dadgeha Bilind (Daniştay) çûye ser karmendîyê (Midûrîya Karên Rêveberiya Dadgehê).

Di serdema karmendiya xwe de, pirtûka bi navê 'Berxwedana Elektropola' nivîsîye. Di sala 2008an de malpera webê ya takekesî bi navê “www.mervanserhildan.com” vekirîye. Bi Tirkî û piranî jî bi Kurdî, li ser rojevê û mijarên girîng nêzî 600 makale, dosya û perspektîf nivîsîye. Ji van makaleyan, li derdora 300 nivîsên wî di rojnameya Azadîya Welat de weşîyane. Di 2009an de sertîfîkaya Mamostetîya Zimanê Kurdî wergirtîye. Di navbera 2010 û 2018an de li Rojnameya Azadîya Welat 3 salan karê sererastkirinê (redaksîyon) kirîye, 3 salan di rûpela Forumê de nivîskarî û 3 salan jî di rûpela Aktuelê de qunciknivîsî kirîye. Niha karên nivîskarî, çavdêrî û çalakgerîya zimanê Kurdî didomîne.

Berhemên Mervan Serhildan:

- Berxwedana Elektropola, roman, Weşanên Berbang, 2015 – Stenbol; çapa 2yemîn Weşanên       J&J 2023 - Amed

- Gerîneka Hestan, helbest, Weşanên J&J, 2019 – Amed

- Paradîgmanin Înfazi, analîz- bi Tirkî, Weşanên J&J, 2019 – Amed  

- Sosinê, roman, Weşanên J&J, 2023 – Amed